El Fiscal énte’l TC diz que ta avaláu l’usu del asturianu por funcionarios

Don Jesús-José Tirado Estrada, Fiscal énte’l Tribunal Constitucional afita que’l TC avala l’usu de les comunicaciones n’asturianu de ciudadanos y funcionarios col Principáu.

Según indica Xurde Blanco Puente, ‘La Ley’, una de les espublizaciones más prestixoses no que cinca a xurisprudencia y anuncies xurídiques, pente medies del so “Diario”, vien d’espublizar que pal Fiscal énte’l Tribunal Constitucional, don Jesús-José Tirado Estrada, ye una evidencia que l’autu del Tribunal Constitucional de data 25 de febreru de 2010 avala l’usu de les comunicaciones n’asturianu empobinaes a l’Alministración del Principáu d’Asturies de tolos ciudadanos, “mesmamente de los que tienen la condición de funcionarios”.

Pal xurista, contrasta la opinión d’esta autoridá, “d’otra miente próxima al pleitu ente’l roblante y el xuez titular del Xulgáu númberu 3 de lo Contencioso-Alministrativu d’Uviéu énte’l Tribunal Constitucional”, col conteníu de la posterior sentencia d’esi xulgáu negando a los funcionarios el derechu d’usar l’asturianu nes comunicaciones cola Alministración.